ZICHERBACHER
KERWAZEITUNG
Ziegenbachs Kirche 1985 Ziegenbachs Kirche


Aufgrund negativer Erfahrungen bei den Umzügen selbst sehe ich mich genötigt zu betonen, daß die in den Kirchweihzeitungen veröffentlichten Ansichten und Darstellungen nicht meiner persönlichen Meinung entsprechen. Sie werden hier nur wiedergegeben, um die tatsächlich so gehaltenen Kirchweihpredigten einem größerem Publikum zugänglich zu machen.

Thomas Schad


Des Gülle fahrn, ja des is schee.
Und überhaubt bei Schnee!

Da hat si aaner gedacht: "Des is toll,
denn die Gruum is a grad voll!"

So fährt er aufn Acker naus,
und läßt der Gülle ihren Lauf.

Doch glei am Anfang, da is passiert,
der Bulldog, der hat durchgeschmiert.

Der Bauer denkt: "Des hab i gleich,
wenn des ganze Gschpann da streikt.

Die Gülle spritz i auf die Wiesn naus,
dann kumm i aus den Dreck da raus."

Wie gesacht, so hat ers gmacht,
und die Sach hat a geklappt.

Doch an an scheena Frülingstag,
da hats den Bauern na geplacht:

"Die Gülle is nu auf der Wiesn drauf,
die muß doch aufn Acker nauf!"

So hat er sich die Müh gemacht,
und hat des Zeuch mit der Händ aufn Acker verfracht.


Zum Reiten braucht mer halt viel Platz.
Dann macht die ganze Sach a Spaß!

So hat aaner sei Pony gnumma,
und is mit Kind und Kegel aufn Spielplatz kumma.

Die Kinner hocken sich dann drauf,
und er führt sie vo unten bis ganz nauf.

Doch nach die ersten paar Versuch,
da hat des Ponny scho genuch.

Er selber hat si a draufghockt,
da hat des Vieh nu mehr gebockt!


A Gartenfräsn is a feines Ding.
Und hängt mer nu a Kutschn hin!

Des hat aaner glei probiert,
und hat des Gschoß glei nu frisiert.

Mit die größern Räder fährt er dann
nu so schnell als wie er kann.

Da hockt er auf dem Gschpann dann drauf,
und fährt nu heit n Schmiedsranga nauf.


"Des Birkenstecken, des is schee.
Da müßt mer a glei mal hi geh!"

Des ham si a paar Auswärtiga gedacht,
und ham des halt dann a gemacht.

Mit Beil und Säng sins angrückt kumma,
und ham die Birkn in die Mangl gnumma.

Drei Birkn ham si aufgestellt,
aber bloß zwa davo gefällt.

Die anna Birkn hams net verschont.
Doch bei der aner hams net gwißt, wo die wohnt.

So sacht die a heut nu ganz gewitzt:
"Meina hams mer net gekürzt!"


Des Musikspiel is neu endeckt worn,
die Leut wern aus der ganzn Umgebung zamgfahrn.

Da werd in Rekordzeit a trainiert,
und viel neua Stückli ausprobiert.

Der Vorstand sacht: "Euch müß mer drilln,
denn mir ham heuer viel zu spieln!"

Jetz spieln si a scho wirkli schee,
doch manches könnt nu besser geh.

Die Organisation klappt a nu net so richtig, des waaß i gwiß,
denn net amal der Vorstand waaß wenn Musikprob is.

Der bräucht sowieso an Computer statts an Terminkalenner,
denn an die Feuerwehrübung denkt er a scho nemmer.


Die medizinische Versorgung klappt bei uns a,
dafür is der Oberschaflder Dokter da.

Jedn Montach kummt er zum Pfeuffer her,
und jedsmal wern sei Kundn mer.

Is der Dokter dann da,
so zeign sich die Krankn a.

Auf der Straß da werd die Praxis betriem,
und wenn nöti nu a Rezept verschriem.

Wie die Leut zum Metzger gehn,
so dansi dort aa Schlanga stehn.

Doch wenn der Dokter huupn tät,
kummert a kanner mehr zu spät!


Beim Dreschn da gehts oft haaß her,
da hat mer oft kan Waang mehr leer.

Da denkt si aaner, er kann sicher
an Kipper mal vom Nachbern ham.

Den Nachbern, den ham si glei gefracht,
und der hat sofort zugesacht.

Die Fra und a Helfer holn glei den Bulldog her,
denn der Waang is angebli leer.

Sie is des erste Mal aufn Acker naus gfahrn,
und is draußen glei gschent nu worn.

Der Bauer recht si ganz schee auf:
"Ihr Simpl habt nu an Haufn Ausputz drauf!"

Und die Moral vo der Geschicht:
Gedraatausputz nimmt der Müller nicht!


Des Autofahrn is net so leicht,
überhaubt wenn mer Spitzengeschwindigkeiten erreicht!

Beim Sprung übern Graam, da is passiert,
er hätt net gedacht, daß er die Achs verliert!

Ihn hats ausn Sitz nausghoom,
und beim Auto die Schnauzn verboong.

Der Lindacher hat a viertel Jahr drou rum repariert,
und maant: "Zum Glück is net mehr passiert!"


Wenn der Roggn drin licht, da hat mers schwer.
Da hilft a Mähdrescher a nix mehr.

Des Gedraat derf mer net freckn lassn,
so muß mern Bulldog ougreifn lassn.

Mit dem Schlepper wird des Zeuch gemäht,
denn für alles annere wars zu spät.

Und der Bauer hat si dabei was gedacht,
und hat alles glei auf Rali gmacht.

Der Mähdrescher hat si dann leicht gedann.
Der is bloß die Rali entlang gefahrn!


Hochzeitn die sen allerweil modern,
so was hern mir a recht gern.

Normal wird aber öffentlich gefeiert,
und net geheim geheiert!

Am Samstag da hats jeder gwißt,
daß die Hochzeit auswärts ist.

Mit einem Lärm sins durchs Dorf gefahrn,
so hat des jedermann erfahrn.

Weil nix bekannt worn ist,
ham mer a nix vom Polteraamd gwißt.

Wenn alla Leut ihr Hochzeit so heimli feiern,
da pfeiff mer auf des ganze Heiern!


In Zicherbach gibts klanna Buum,
die spieln gern an der Sickergruum.

Schneckn muß dort a geem,
denn sie ham gsacht, si welln welche fanga gehn.

Auf der Gruum sen si rumgerennt,
und ham gschaut, wer die masten Schnecken fängt.

Des ham si a ganza Weil gemacht,
doch plötzlich is a Brett gekracht!

Die Hosn warn a weng verschmiert,
mehr is zum Glück a net passiert.

Doch aans is wichti, Leut passt auf:
am annern Tach war auf der Gruum a Betondeckel drauf!


In der neuen Kneipe herrscht reger Betrieb,
des is dem Wirt a recht und lieb.

An der Einweihung hams Tisch und Bänk dazu neigstellt,
doch Plätz ham immer nu gnuch gfehlt.

Wenn da immer so viel Leut kumma und genn,
da müßt die Wirtschaft nu mal umgebaut wern!


A Fra denkt: "Die Muckn sen heuer a recht schlimm,
da häng i an die Tür an Vorhang hin!

So a Ding is glei geknüpft,
schau mer mal, obs a was nützt!"

Als ferti war, wars zu kurz geraten,
da hat glei der Familienrat beraten.

Sie denkt: "Wenn i des am Frontlader hi häng,
müßt des Ding doch länger wern!"

Am Bulldog hängt der Mucknschutz drou,
so kumma am Bauern a ka Muckn nou!


Beim Taubnschlachtn hat mers schwer,
da kumma oft die Katzn her!

A Katz hat an Kopf geklaut,
und is durch die Scheuern abgehaut.

Die alte Fra hat gedacht: "Die hat die ganze Taubn gepackt"
und hat si gleich auf die Such gemacht.

Nach aaner Weil hats dann genuch
vo der ganzen Viechersuch.

Am Schluß hat si dann rausgestellt,
daß der Taubn hat bloß der Kopf gefehlt.

Um die ganze Sach zu begraam
hats dem Katzenbesitzer a paar Taubn hintergetraagn.


A Bauer maant: "Des Gedraat steht nu daham,
des muß i nauf zum Hutzler fahrn!"

Grad beim Hutzler oukumma,
hams dei Gedraat net ognumma.

A drümmer Wut hat der Bauer ghat
und schreit: "Scheiß auf des ganze Gedraat!"

Den ganzn Tach hat er nu geflucht,
und hats am nächstn nu mal versucht.


Zurück zu Schad!s BrauchtümlichesZurück zu Schad!s Brauchtümliches
Zurück zu Schad!s HeimatseiteZurück zu Schad!s Heimatseite